भूकम्पपीडितलाई रु छ करोड राहत वितरण
![](https://bankkosamachar.com/wp-content/uploads/2016/10/bhojpur.jpg)
भोजपुर, ५ कात्तिक । भोजपुर जिल्लाका भूकम्पपीडितलाई हालसम्म रु छ करोडभन्दा बढी रकम वितरण गरिएको छ ।
जिल्ला प्रशासन कार्यालय भोजपुरका सहायक प्रमुख जिल्ला अधिकारी तथा सूचना अधिकारी राजन पाण्डेका अनुसार भूकम्पमा घर पूर्ण र आंशिकरुपमा क्षति भएको तथा ज्यान गुमाएका परिवारलाई गरी रु ६ करोड २९ लाख ५३ हजार राहतस्वरुप वितरण गरिएको हो । भोजपुरमा भूकम्पपीडितका लागि आएको कुल रकम रु ६ करोड ५० लाखमध्ये सो रकम वितरण गरिएको सहायक प्रजिअ पाण्डेले जानकारी दिनुभयो ।
भोजपुरमा रहेका दुई नगरपालिका र ५४ वटा गाविसमा भूकम्पका कारण तीन हजार सात सय ५१ घर पूर्णरुपमा र ६ हजार पाँच सय ६१ घरमा आंशिकरुपमा क्षति पुगेको जिल्ला प्रशासन कार्यालयले जनाएको छ ।
भूकम्पबाट भोजपुरको दोभाने गाविस सबैभन्दा बढी प्रभावित रहेको पाइएको छ । दोभानेमा सात सय ८० घर पूर्ण र दुई सय ४० घरमा आंशिकरुपमा क्षति पुगेको थियो । दोभानेमा दुई सय ३३ घरले पाँच हजारका दरले रु १५ लाख ४० हजार लगेका छन् भने रु तीन हजारका दरले रु सात लाख २० हजार र रु १५ हजारका दरले राहत रकमबापत रु ३४ लाख ९५ हजार गरी जम्मा रु ५७ लाख ५५ हजार वितरण गरिएको जिल्ला प्रशासन कार्यालयले जनाएको छ ।
जिल्ला प्रशासन कार्यालयका अनुसार पाँच हजारका दरले एक हजार आठ सय ७४ घरले राहत रकमबापत रु एक करोड ५० लाख ५० हजार पाएका छन् । यसैगरी, तीन हजारका दरले रु एक करोड ८९ लाख ९३ हजार वितरण गरिएको छ ।
यस्तै, भूकम्पमा परी ज्यान गुमाएका परिवारलाई रु आठ लाख प्रदान गरिएको सहायक प्रजिअ पाण्डेको भनाइ छ । जिल्ला प्रशासन कार्यालयका अनुसार रु १५ हजारका दरले रु दुई करोड ८१ लाख १० हजार भूकम्पपीडितलाई राहतस्वरुप वितरण गरिएको छ । रासस