‘क्रसमान्डु नेसनल च्याम्पियनसिप २०१६’ भव्यताका साथ सम्पन्न

काठमाडौं, २३ साउन । राजधानीको तिनकुनेमा ‘क्रसमान्डु नेसनल च्याम्पियनसिप २०१६’ भव्यताका साथ सम्पन्न भएको छ । दर्शकहरुको उत्साहजनक उपस्थितिमा सम्पन्न च्याम्पियनसिपमा अस्कर श्रेष्ठले प्रथम स्थान हासिल गरेका छन् । त्यसैगरी प्रशान्त कार्कीले दोस्रो र सुरज डण्डेगुलुले तेस्रो स्थान हासिल गरेका छन् ।

नेपाल मोटरसाइकल फेडरेसन (एनएमएफ) को आयोजनामा संचालित उक्त च्याम्पियनसिपमा २५० सिसीसम्मका ४५ जना अफरोड डर्ट बाइक राइडरको सहभागिता रहेको थियो । राष्ट्रिय खेलकुद परिषदकी सदस्य सचिव अस्मिता गुरुङले उद्घाटन गरेको उक्त च्याम्पियनसिपका सहभागी राइडरहरुलाई नेपाल अटोमोबाइल्स एसोसिएसन (नासा) का महासचिव गोविन्द भट्टराईले सपथ दिलाएका थिए ।

तिनकुनेमा निर्माण गरिएको करिब ५५० मिटरको अफरोड ट्रयाकमा बाइक राइडरहरुले आफ्नो रेसिङ कौशल प्रदर्शन गरेका थिए । अन्तर्राष्ट्रिय तालिमप्राप्त मार्सलहरुको सुपरिवेक्षणमा संचालन गरिएको उक्त च्याम्पियनसिपमा भाग लिने खेलाडीहरुलाई समेत रेसिङ सम्बन्धी आधारभूत प्राविधिक ज्ञान र निर्देशन प्रदान गरिएको थियो । प्रतियोगितालाइ क्वालिफाइङ, सेमी–फाइनल र फाइनल राउन्ड गरी ३ चरणमा विभाजन गरिएको थियो । चिकेन रयाम्प, हाई स्पिड ट्रयाक र हाई जम्प जस्ता विभिन्न प्रकारका ट्रयाकमा उक्त च्याम्पियनसिप सम्पन्न भएको थियो ।

च्याम्पियनसिपका बिजेताहरुले क्रमशः ३० हजार, २० हजार र १० हजार नगद तथा सिल्ड, पदक र प्रमाणपत्र प्राप्त गरेका थिए । त्यसैगरी विभिन्न प्रकारका गिफ्ट ह्याम्पर समेत प्राप्त गरेका छन् ।

अफरोड राइड रुचाउने बाइक राइडरहरुका लागि यो एउटा उपयुक्त प्लेटफर्म भएको र यसको माध्यमबाट उनीहरुका लागि अन्तर्राष्ट्रिय लेभलको प्रतियोगितामा समेत सहभागी हुने ढोका खुल्ने छ । नेपाल जस्तो कठीन भौगोलिक बनोट भएको देशमा यस प्रकारको इभेन्टले पर्यटन प्रवद्र्धनमा समेत सहयोग पुग्ने विश्वास गरिएको छ ।

नेपाली युवाहरुका बीचमा अत्यन्तै लोकप्रिय एसिया विङ अन्तर्गतको क्रसफायर बाइकको मूख्य प्रायोजनमा सम्पन्न उक्त च्याम्पियनसिपको अन्य प्रायोजकमा यूएम बाइक, टीभीएस टायर, रेडबुल लगायत रहेका थिए । उक्त च्याम्पियनसिपको प्रमोसनल पार्टनर नेपाल अटो इन्फो, म्यगेजिन पार्टनर अटोमोबाइल मासिक, इभेन्ट पार्टनर नेपाल कल्चर एन्ड एड्भेन्चर इभेन्ट र ट्राभल पार्टनर फुटमार्क ट्राभल एन्ड एड्भेन्चर्स रहेका थिए । जिल्ला खेलकुद विकास समिति काठमाडौं र नेपाल अटोमोबाइल्स एसोसिएसन (नासा) को समेत सहयोग रहेको उक्त च्याम्पियनसिपले अफरोड बाइक राइडिङको क्षेत्रमा नयाँ पहिचान स्थापित गरेको इभेन्ट म्यानेजर सन्तोष न्यौपाने बताउछन् ।