चौध सय हेक्टर खेतीयोग्य जमिन घट्यो
रत्ननगर (चितवन), ३० कात्तिक । भरतपुर आसपास क्षेत्रमा सिञ्चित जमिन घट्दै गएको पाइएको छ ।
बढ्दो सहरिकरण र जग्गा प्लटिङका कारण खेतीयोग्य जमिन घट्दै गएको हो । नारायणी लिफ्ट तथा खगेरी सिँचाइ व्यवस्थापन डिभिजन कार्यालयका अनुसार विगतमा सो क्षेत्रमा चार हजार ७०० हेक्टर क्षेत्रफल खेतीयोग्य भएकाले सिञ्चित क्षेत्रमा राखिएको थियो ।
तर अहिले नारायणी लिफ्टको सिञ्चित क्षेत्र तीन हजार २१२ हेक्टरमा झरेको छ । प्लटिङ र सहरिकरणका कारण खेतीयोग्य जमिन घट्दै गएको कार्यालयका इन्जिनियर भरतबहादुर थापाले बताउनुभयो । भरतपुर र पश्चिम क्षेत्रमा नारायणी लिफ्ट सिँचाइ र खगेरी नहरले सिँचाइ सुविधा पुगेको छ । खगेरीबकाट तीन हजार ९०० हेक्टर र नारायणीबाट चार हजार ७०० हेक्टरमा सिँचाइ पुगेको थियो ।
भरतपुर आसपास क्षेत्रमा सिञ्चित क्षेत्र घटेकाले ‘सि’ नहरको केही भाग बन्द भएको छ । भरतपुर, गीतानगर, फूलबारी, मङ्गलपुर, शिवनगरमा सिञ्चित जग्गा घट्दै गएर सहरिकरण हुन थालेको छ । अहिले सिँचाइ सुविधालाई व्यवस्थित गर्न रु ८५ करोड लागतको वृहत्तर परियोजना कार्यालयले सञ्चालन गरेको छ । रासस
