डिडिसीद्वारा दूधमा ठगी
काठमाडौँ, १० साउन । दुग्ध विकास संस्थान (डिडिसी) बाट उत्पादित दूधको परिमाणमा ठगी भएको फेला परेको छ । नेपाल गुणस्तर तथा नापतौल विभाग क्षेत्रीय कार्यालयले काठमाडौँले नाप जाँच गर्दा आधा लिटर दूधमा ११० मिलिलिटर दूध घटी भएको फेला परेको हो ।
आपूर्ति व्यवस्थापन तथा उपभोक्ताहित संरक्षण विभागले नेपाल गुणस्तर तथा नापतौल विभागमार्फत क्षेत्रीय कार्यालय बालाजुलाई नापजाँचका लागि चिठी पठाएपछि नाप गर्दा उक्त मिलिलिटर कमी फेला परेको हो ।
क्षेत्रीय कार्यालयका प्रमुख शशिभूषण यादवले आधा लिटर दूधमा यतिधेरै मिलिलिटर कमी भएको फेला परेपछि कारबाहीका लागि डिडिसीलाई पत्राचार गरिएको जानकारी दिनुभयो । यस्तो कमी फेला परेपछि क्षेत्रीय कार्यालयले आजै अनुगमन गरिने प्रमुख यादवले बताउनुभयो ।
बढी भाडा लिने ट्याक्सी कारबाहीमा
नेपाल गुणस्तर तथा नापतौल विभागअन्तर्गतको ट्याक्सी ट्याम्पो इकाइले आर्थिक वर्ष २०७२/०७३ मा २१३ ट्याक्सीलाई कारबाही गरेको हो ।
इकाइले कल फास्ट, सिल नभएको, डेढगुना भाडा लिएको, मिटर बिगारेर बढी भाडा लिएको भन्दै उक्त ट्याक्सीलाई कारबाही गरेको हो । कारबाही परेका ट्याक्सीमा फास्ट कल गर्ने ७, सिल नभएको ७३, डेढगुना भाडा लिएको ५७ र मिटर बिगारेर बढी भाडा लिएको ७६ रहेका छन् ।
इकाइका प्रमुख विकास ध्वजुले नापतौल ऐन मिचेर ट्याक्सी चलाएको उजुरी इकाइमा परेपछि अनुगमन गर्न जाँदा उक्त ट्याक्सीलाई कारबाही गरेको बताउनुभयो । उहाँले उक्त कारबाहीमा परेका ट्याक्सीबाट रु तीन लाख ११ हजार राजस्वसमेत सङ्कलन गरेको जानकारी दिनुभयो । इकाइले गत वर्ष १२८ सवारी साधनलाई कारबाही गर्दा रु दुई लाख ४४ हजार राजस्व सङ्कलन गरेको थियो ।
उहाँले अहिले पनि पाँच ट्राफिक र इकाइका एक जना कर्मचारी ट्याक्सीको अनुगमनमा खटिने गरेको स्पष्ट पार्नुभयो । इकाइले हाल नयाँ ट्याक्सीको दर्ता, नवीकरण, नामसारी र अनुगमन गर्दै आएको छ । रासस
